Siak ti Babai a Saringit ti Kinakurapay
Siak ti babai a saringit ti kinakurapay:
Kayumanggi a kudil a rinames ti agraraay
A rarasa, naangrag a buok kas aragan,
Pinagbutuan a dakulap ti kataltalonan
Mukod a pinaglaya dagiti bingkol
Tiniltil ti bisin
rinasaw ti waw
ginawat ti rigat
A nangiduron tapno birokek kaimudingan
Bagas ti bugas ti nakirmet a kaipapanan
Ti puli iti sudi ken sidong sabali a pagilian.
Gapuna, pinaraburannak iti payak
Dagiti araaapko a mangsurot iti sungab
Ken sung-ab ti agsusungani a tabbayog
Dagiti tibbayo, inikutak a tagiruot
Sidudungngo a nagtalimudok
Iti barukongko, alay-ay iti natalipupos
A panagtaligugot tapno makawesan
Ti lamolamo a kinapudno a narigat piman
Nga ilemmeng ti kinapanglaw: awanan
Karbengan nga agpili ti makamkamtudan.
Nagsiding iti singin dagitoy dapan.
Adayo, adayo innak nagnagtengan:
Kadagiti sumsumged a darat ti desierto
Nakalamlamiis ti dusngi dagiti kamelio
Kadagiti makabibineg a lamiis ti yelo
Makasiram ti ngirsi dagiti lobo.
Kas kaniak, nakatuon dagiti matada
Iti adayo. Nalabit, salsaludsodenda
No sadino ti batog naggapuanda a yuyeng
Nagmudosan ti ungto ti baag-ti-ari
A sinursurotdan manipud kinaubingda.
(Ay, ay, dinak sagiden
Uray laeng iti ramay ti panagkitam
Ta nupay nagtaudak iti puli nga agbuggo
Iti bakka agkammet no mangan iti dulang
Agdeppel bugguong dimo ipato a kabaelam
Ti kinalap-itko dinakto mataldengan
Dikanto agballigi a mangidadanes
Iti babai a nupay nasiuman iti rigat
Nakasagana a makirinnamas mapasag
Iti nagan ti kalintegan ken panagpapatas).
Kayatko nga ipato: siak ti babai
A saringit ti puli a nagpunipunan galad
Ammok a tagipatgen ti dayaw
Rumkuasak iti irurupir ti panangirurumen
Asino man nga agpanggep a mangitulmeng
Kadagiti puro
kadagiti bantay
kadagiti baybay
Yuyeng ken lengleng di nabaelan a lengngesen
Dagiti agongan a ganggannaet a nailem.
Adda anninek kadagiti anggimo
Dagiti natukantukad a kinelleng dagidi appo
Adda kinitikitda nga annawid manipud dapo
Dagiti bulkan, tanda a di aglaeg, agipadto
Kadagiti masakbayan a mabangon iti bato
Iti tunggal pangal ti agdan a masangal
Ken mailiktad, pagbaribarian ti tunggal
Sumar-ong: pasimudaag dagiti siglo
Nga umay ken mapan, taragob a talado
Tapno di agpasidumri dagiti di makitkita
Ngamin, dagitoy dagiti tibker ti kaputotan
Nga agitugot kadagiti nagkawweng a dapan
Mangsurot iti dalan nga agtalimeng
Iti laud, iti sab-ok dagiti nalulem a malem.
Amin dagitoy, isuda ti balonko a tangsit
Talipupos, kas talimuging, talek ken talged
Uray kadagiti nataliwayway a kanito
Nga akliliennak ti iliw ken mamayo.
(Ay, ay, dimo gandaten a rabngisen
Ikutko a tarnaw talingenngen
Nagtaudak man iti gingget ti bantay
Wenno tangrib ti baybay bumkes ti taruday
Iti tunggal panagem a dursok ken law-an
Adda irurukuas uray kadagiti kaltaang
Dimonto mapasleg iti uray kaano man
Babai nga ininaw ti puli ni Gabriela Silang.)
Iti kaadayok, saanak a pimmanaw
Uray apagdarikmat kadagiti sin-aw
Ken sidaw dagiti inep a nakairuaman
Amin nga ipapanaw adda panagsubli
Kas kadagiti sawi no kasta nga umadani
Ti dugudog agampayagda nga agpadaya
Surotenda dagiti sinamar ti agsapa
Tapno iti panagani agsublida nga agaayam
Iti pingping ti liweng ti langit kabayatan
Pannakarakem dagiti naluom a lugangian.
Wen: nalap-itak, galadko dayta a naipasngay
Ganggannaet, dimo gamden ti manggundaway
Tagaboak man, ammok a duomen ti tarumpingay
Nupay siak ti babai a saringit ti kinakurapay.
REYNALDO A. DUQUE
(Paset ti koleksion dagiti dandaniw a pinangabak ti autor iti Maikatlo a Gunggona, Salip iti Daniw, Komisyon sa Wikang Filipino 2006)
Popularity: unranked [?]
