Agwarsitayo iti Bagas
Pangbugtak kadagiti karkarna ti bislak
Daytay pangitali iti sangasako a ragsak
Sandi dagiti arapaap a malusak-lusak.
Agwarsitayo iti bagas, bagas a baak
Yunatayo dagiti diputado dagiti libak
Dagitay man nakakurbata nga aginsisiglat
Mangomkomision iti kinirog a rigrigat.
Ay, agwarsitayo iti bagas, bagas a baak
Isarunotayo dagiti senador dagiti beklat
Warsiantay ti dadaulo, sapsapuan ti akak
Agas buy-ong a di nagbannog, agas ti kirat.
Ay, agwarsitayo iti bagas, bagas a baak
Iramantay ti palasio dagiti kari ti perdi a pirak
Ti palasio a kasingin dagiti naisalda nga utek
Ti palasio a Malakanyang ti arestado nga agek.
Ay, agwarsitayo iti bagas, bagas a baak,
Pangpadisi amin a mangmangkik, amin a sinalbag
Dagitay man para imula iti buteng iti bayakabak
Mangibalud iti paguuray a bendision iti agpatnag.
Ay, agwarsitayo iti bagas, bagas a baak.
Warsi a pangpaksiat kadagiti saraaw ti pinggan
Warsi a pangbugiaw mannanakaw a kaibaan
Saraaw ken kaibaan, kontra signos ti paggaak.
Ay, agwarsitayo iti bagas, bagas a baak
Nasamay daytoy a pangdalus di ikankano a tulag
Nasamay a pangpartuat manen iti baro a biag
Sandi’t inaradasda nga aldaw a napusaksak.
Aurelio Solver Agcaoili
(Paset ti koleksion dagiti dandaniw a pinangabak ti autor iti Umuna a Gunggona, Salip iti Daniw, Komisyon sa Wikang Filipino 2006)
Popularity: unranked [?]
