GUMIL Metro Manila

Ni Ma. Rose A. Cabie

CALOOCAN CITY – Kiniddaw ni Regional Trial Court Judge Vivencio Baclig ti panagtitinnulong dagiti mannurat nga Ilokano iti Metro Manila tapno dumur-as ti Literatura Ilokana.

Imbatadna daytoy a kiddaw iti maika-43 nga anibersario ken Christmas Party ti GUMIL Metro Manila, maysa kadagiti tsapter ti GUMIL Filipinas, ti asosasion dagiti mannurat nga Ilokano ditoy pagilian ken ballasiw-taaw.

Naangay ti anibersario iti maikatlo a kadsaaran ti Child Jesus College ditoy Bagong Silang iti daytoy a siudad, ti pagadalan nga imatonan dagiti agassawa a Jose ken Dr. Crispina Bragado, agpada a mannurat.

Dinayaw ni Hues Baclig, tubo ti Cabugao, Ilocos Sur ken maysa met a mannaniw ken mannurat iti sarita ken agdama a Regional Trial Court Judge iti Siudad ti Quezon, ti gapuanan ti gunglo kadagiti napalpalabas a tawen. Maibilang ditoy dagiti panagiinnadal dagiti kameng, panagbasa iti daniw, pannakayam-ammo ti Ilocano performing arts wenno sarsuela iti Metro Manila, ken pannakaipabuya ti maysa a drama idi 2005.

“Adu dagiti mabalintayo nga aramiden. Ket patiek nga adu pay dagiti sabsabali a pampanunotenyo a mabalintayo nga aramiden,” kinuna ni Baclig.
Innayonna: “Agtitinnulongtayo ngarud. Iti rigat ken nam-ay, iti ragsak ken ladingit, agsisinnaranaytayo– ta kasta ti agkakabsat iti sidong ti gunglotayo a GUMIL Metro Manila.

“No agtultuloy ti ititibker ti GUMIL Metro manila, kangrunaan a mairanud ti Literatura Ilokana ta ad-adu no kua dagiti proyekto a maisayangkat, kangrunaanna ti panagilibro ken panagipablaaktayo kadagiti sinurattayo…”
Binigbig ni Baclig ti poetry reading contest nga ang-angayen ti GUMIL Metro Manila, “ti kakaisuna pay laeng kadagiti tsapter ti GUMIL Filipinas a mangang-angay iti tinawen a poetry reading contest.”

Nairugi daytoy iti dekada ‘90, ket dati a naipanagan iti lagip daydi Dr. Horencio Ma. Hernando, maysa a mannaniw ken lirisista a taga-Ilocos Norte.
Iti kampeonato ti panagbasa iti daniw iti anibersario ti gunglo iti daytoy a tawen, inyalludan ni Aida C. Tiama ti Asingan, Pangasinan ti Umuna a Gunggona.

Idinto a da Jovito F. Amorin ti Santa Maria, Ilocos Sur ken Ariel S. Tabag ti Santa Teresita, Cagayan ti nangabak ti Maikadua ken Maikatlo a Gunggona kas panagsarunoda.

Ni Martin T. Rochina, dati a Presidente ti GUMIL Metro Manila ken Editor ti Saluyot, ti pagwarnakan dagiti kameng ti gunglo, ti nangiyam-ammo ken Hues Baclig kadagiti kameng ken sangsangaili.

Nagbitla met ni Engr. Ansel D. Cargo, agdama a Presidente ti GMM, a nangibuksil iti yaman ti liderato kadagiti tunggal kameng a patinayon a tumultulong iti panangpapigsa iti gunglo ken iti literatura dagiti i-Amianan.

Inikkan pay ni Cargo dagiti kameng a nangab-abak kadagiti pasalip iti tay-ak ti literatura ti sertipiko (President’s Awards) kas pangbigbig kadakuada iti anepda a mangpabpabaknang iti literatura ni Samtoy.

Naipasdek ti GUMIL Manila idi Disiembre 11, 1966, dua a tawen sakbay a maipasngay ti GUMIL Filipinas, iti panangidaulo ni Dr. Hermogenes F. Belen ti La Union inggana’t ipupusayna idi 1976.

Kalpasan pannakaituglep ti gunglo, nakariing ket timmanor ti GUMIL Metro Manila idi Hunio 1987, iti panangidaulo ni Juan A. Alegre ti Ilocos Norte (1986-1988); Jose A. Bragado ti Ilocos Sur (1988-1989);  Atty. Nole V. Lansangan ti Isabela (1989-1990); Lorenzo G. Tabin ti Ilocos Sur (1990-1992); Prof. Honor Blanco Cabie ti Ilocos Norte (1992-1996); Dr. Ariel S. Agcaoili ti Ilocos Norte (1996-1998); Martin T. Rochina ti Ilocos Sur (1998-2000); Cles B. Rambaud ti Ilocos Norte (2000-2002); Angel Calso ti Cagayan (2002-2006); Herman G. Tabin ti Ilocos Sur (2006-2007); ken Engr. Ansel D. Cargo ti La Union (2007-agpapan ita).

Popularity: 31% [?]

Bitla ni Judge Vivencio S. Baclig

Kadakayo padak a kameng ti GUMIL Metro Manila nga idauluan ni Engr. Ansel Cargo, dagiti panuli ti Literatura Ilokana ken dagiti sagibona, dagiti sangsangaili a mannurat iti sabali a lengguahe, dagiti kamkameng ti pamilia, amin a naitallaong, kangrunaanna da agkaingungot a Manong Joe ken Manang Crispina Bragado a nangpasangbay kadatayo, naimbag a bigattayo amin a sangapada.

Kunak a naisangsangayan ti GUMIL Metro Manila. Ngamin, rambakantayo ita ti maika-43 nga anibersario ti gunglotayo idinto a ti nanangna a GUMIL Filipinas, rambakannanto pay laeng ti maika-42 nga anibersariona inton Abril. Immun-una a nayanak ti anak ngem iti nanangna.
Ania ti kayat nga ipaawat daytoy? Kayatna a sawen a kaaduanna a kameng ti GUMIL Metro Manila ti nakipaggamulo iti pannakainaw ti GUMIL Filipinas. Sipatantayo man dagiti bagbagitayo.

Maysa pay a naisangsangayan iti GUMIL Metro Manila, a no dikam mabasol, kadagupan amin a chapter ti GUMIL Filipinas, ti GMM ti kaaduan iti naipablaak a libro. Naisaysayangkat daytoy babaen ti sistema a tagnawa wenno panidna, bayadanna- a kas iti naal-alimadamadmi, tinulad met dagiti dadduma a chapter daytoy a wagas iti panagipablaakda iti libroda.

Ala, ket sipatantayo manen dagiti bagbagitayo.

Daytoy ti maamirismi nga akem ti GUMIL Metro Manila iti GUMIL Filipinas, ti agbalin nga ulidan ken para rusat kadagiti gannuat para iti Literatura Ilokana. Adda dita a nairusat iti kallabes ti panagiinnadal dagiti kameng- a maitultuloy met iti agdama iti administrasion ni Apo Cargo. Iti di pay nabayag, pinaregta ti GMM ti Ilocano performing arts iti Metro Manila. Nupay nalugitayo idi nagpasarsuelatayo, ti nasken, nagpasarsuelatayo. Bareng iti sumaruno a panagipabuya ti gunglotayo iti sarsuela, mismonton a dagit kamengna ti agakem. Ket siguro, mabalinkonto met ti agakem a kontrabida. Ang-angawko laeng dayta, apo.

Saan laeng a nagpasarsuela ti GUMIL Metro Manila, nagpabuya pay iti drama iti pannakaangay idi ti kombension nasional ti GUMIL Filipinas idi 2005. Sayang laeng ta awan panawenko idi ta nakipartisiparak met koma.

Adda pay sabsabali a rumbeng a pakaragsakantayo iti panangrambak ti gunglotayo iti anibesariona ken iti Paskua. Ngamin, ti GMM ti immuna a GUMIL chapter, immun-una manen ngem iti GUMIL Filipinas!-a naaddaan iti website tapno agbalin metten a global dagiti sinurattayo a kamengna.

Ken, amangan no malipatak, ti met laeng GMM ti kakaisuna pay laeng kadagiti tsapter ti GUMIL Filipinas a mangang-angay iti tinawen a poetry reading contest. Ala, sipatantayo manen dagiti bagbagitayo.

Saan ketdi a nakakaskasdaaw dagitoy nga achievements ti GUMIL Metro Manila ta ti GUMIL Metro Manila ti ayan dagiti kaaduan a mabigbigbig a mannurat iti tay-ak ti Literatura Ilokana. Kaaduan a nagpresidente iti GUMIL Filipinas ket kamengna. Kameng met dagiti staff ti Bannawag a maibilang nga institusion, no di man pagtaengan ti Literatura Ilokana.

Apagapaman laeng pinagpanunotnakami ti napili a tema a “Natibtibker a GUMIL Metro Manila, Nadurdur-as a Literatura Ilokana”. Aglulupoy kadin ti GUMIL Metro Manila?

Saan a kasta ti pammatimi. Ketdi, daytoy ti agtultuloy nga ititibker, agtultuloy nga ilalangto.

Mabalin a kunaen a ti sibubukel a GUMIL Filipinas ti naglupoy. Ta ammotayo metten nga adda dagiti simngay a baro a grupo dagiti mannurat nga Ilokano. No apay, ay, ket saludsodentayo, a, iti bagbagitayo.

Ngem sakbay a biangantayo ti dakdakkel a grupo a kas iti GUMIL Filipinas, nasayaat unay no biangantayo sakbay ti sabali ti grupotayo a kas koma iti GUMIL Metro Manila. Sakbay a patibkerentayo ti GUMIL Filipinas, patibkerentayo nga umuna ti GUMIL Metro Manila, wenno dagiti chapters, kunak man laengen. Ta no natibker dagiti tsapters, ay, ket natibker met, a, ti pannakainatayo a gunglo, ti GUMIL Filipinas.

Pagbalinentayo dagiti tsapter a kas nakidser nga adigi ti GUMIL Filipinas. Ditay itulok nga anayen dagitoy nga adigi tapno di marpuog ti GUMIL Filipinas.

Ania, mayatkayo iti kinunak?

Ania ngamin dagiti saguday ti maysa a natibker a gunglo? Adtoy ti sumagmamano, ket mabalin a nayonanyo:

Daytoy ti panangbigbig ti tung gal kameng iti naituding kadakuada a pagrebbengan. Bassit man wenno dakkel dayta nga akem, masapul a bigbigem ken maaramidmo a nakasaysayaat para iti pagimbagan ti sibubukel a gunglo. Kas itay kunada iti pelikula wenno drama, awan ti bassit wenno dakkel nga akem, dakkel wenno bassit laeng nga aktor/aktres. Ngarud, bassit man dayta nga akem, saan a kompleto wenno saan nga agballigi ti gunglo no dimo inaramid.

Adda dagiti opisialtayo a mangirusat kadagiti gannuat, adda dagiti mamagbaga a mangibagnos, adda met dagiti kameng a mangited iti adda a maitulongda.

Ket no agtultuloy ti ititibker ti GUMIL Metro Manila, kangrunaan a mairanud ti Literatura Ilokana ta ad-adu no kua dagiti proyekto a maisayangkat, kangrunaanna ti panagilibro ken panagipablaaktayo kadagiti sinurattayo, saan laeng nga iti Bannawag, saan laeng nga iti bukodtayo a website, no di pay ket iti bukodtayo a Saluyot. Mabalin a makaipatakdertayto payen iti sarsuela group-tayo, a kas iti nadakamattayo itayen, wenno drama group, wenno makapataudtayo dagiti nalaing a dumadaniw-nangruna ket nagpakada metten ni Dr. Reyes-babaen ti tinawen a panagpaspasaliptayo. Mabalin a makairuartayonto payen iti CD ket dita a mangngegantayo ti kinalaing a dumaniw dagiti kameng ti GUMIL Metro Manila.

Adu dagiti mabalintayo nga aramiden.

Ken patiek nga adu pay dagiti sabsabali a pampanunotenyo a mabalintayo nga aramidem.

Agtitinnulongtayo ngarud.

Iti rigat ken nam-ay, iti ragsak ken ladingit, agsisinnaranaytayo-ta kasta ti agkakabsat iti sidong ti gunglotayo a GUMIL Metro Manila.
Kamaudiananna-kablaawankayo iti Naragsak a Paskuayo. Hi panangrambaktayo iti anibersario ti gunglotayo, idatontayo ken ni Maladaga a Jesus amin a kinasiribtayo-ket sapay koma la :dagiti agubbog iti plumatayo, para laeng koma iti pakaidayawanna.

Popularity: 100% [?]

Rambakan ti GUMIL Metro Manila, ti gunglo dagiti mannurat nga Ilokano iti Kamanilaan ken kabangibangna a probinsia, ti maika-43 nga anibersariona ken Christmas Program-na inton Dis. 13, 2009, 10 A.M. iti Child Jesus College, Bagong Silang, Caloocan City nga imatonan da agkaingungot a Jose ken Crispina Bragado, kas impakaammo ni Engr. Ansel D. Cargo, presidente ti gunglo.

Ni Judge Vivencio S. Baclig, tubo iti Cabugao, Ilocos Sur ken presiding judge ti Quezon City Regional Trial Court, ti agpaay a keynote speaker.

Para iti dadduma pay nga impormasion, umawag iti 400-0089, agteks iti 0918-745-8792 wenno ag-email iti arieltabag@yahoo.com. (Ma. Rose A. Cabie)

(Naipablaak iti Bannawag, Disiembre 7, 2009 a bilang.)

Popularity: unranked [?]

Ipakpakaammo ni Baldovino Baldwin M. Valdez, kameng ti secretariat ti AVAIL (Abuan-Valdez Awards for Iluko Literature) ti pannakalukaten ti maika-12 a pasalip iti panagsurat iti daniw.

Adtoy dagiti pagannurotan:

1.Silulukat ti pasalip kadagiti amin a mannaniw iti Iluko, ditoy ken iti ballasiw-taaw, malaksid kadagiti nangabaken iti Umuna a Gunggona iti nasao a salip.

2. Agatiddog ti daniw iti di ab-ababa ngem 20 a linia ngem di nasursurok ngem 28 a linia. Maysa laeng a daniw ti mabalin nga isalip ti kada mannaniw. Masapul nga orihinal ken di pay naipablaak iti uray ania a magasin wenno pagiwarnak.

3.Maipapan iti edukasion ti tema ti daniw a naikompiuter wenno naimakinilia ket ipatulod iti uppat a nalawag a kopia iti di naladladaw ngem Marso 12, 2009 itoy nga adres: The AVAIL Secretariat, P.O. Box 15, Alicia, 3306 Isabela.

4. Awan nagan ti mannaniw nga agparang iti daniw. Mapakuyogan ketdi iti narikpan a sobre a naglaon iti pudno a nagan ti mannaniw, paulo ti daniw, ladawan (2”X 2”), ken biodata.

5. Karbengan ti esponsor ti pasalip ti mangilibro kadagiti daniw apaman nga umdasen ti bilang wenno mangipablaak iti pilina a magasin.

6. Dagiti gunggona: Umuna a Gunggona, P2,000.00 ken plake; Maika-2, P1,750.00 ken sertipiko; Maika-3, P1,500.00 ken sertipiko; Maika-4, P1,250.00 ken sertipiko; ken Maika-5, P1,000.00 ken sertipiko. Maiyawatto dagiti gunggona bayat ti Maika-42 a GUMIL Filipinas National Convention inton Abril, 2010.

Esponsor ti nasao a salip dagiti appoko daydi Justa C. Abuan ti Asingan, Pangasinan ken daydi Baldomero F. Valdez ti Solano, Nueva Vizcaya kas ruknoy kadakuada babaen ti panangimaton ni Baldovino Ab. Valdez.

Popularity: unranked [?]