GUMIL Metro Manila

Maisagsaganan ti dua a libro ti GUMIL Filipinas: antolohia dagiti napili a sarita dagiti Ilokano, ken  antolohia dagiti napili a dandaniw dagiti Ilokano.

Agpaay nga editor ti antolohia dagiti sarita da Juan Al. Asuncion, Literary Editor ti Bannawag, ken Efren A. Inocencio, premiado a mannurat ken mangisursuro iti Quiling Elementary School, Batac, Ilocos Norte. Idinto nga agpaay nga editor ti antolohia dagiti napili a dandaniw da Joel B. Manuel, premiado a mannurat ken prinsipal ti Banna National High School, ken Ariel S. Tabag, Poetry Editor ti Bannawag.

PAGALAGADAN ITI PANAGIDATAG

1. Iti sarita, dua a di pay naipablaak wenno naipablaaken iti magasin, wenno dadduma pay a babasaen/ti idatag. Idinto nga iti daniw, saan a makedngan ti bilang dagiti daniw nga idatag. No naipablaaken, masapul nga adda notasion iti baba dagiti sinurat  mainaig iti detalye ti pannakaipablaak daytoy. Maysa laeng ketdi a sarita ti maipablaak, idinto nga agpannuray kadagiti editor ti bilang dagiti maipablaak a dandaniw ti tunggal autor.

2. Mapakuyogan dagiti sinurat iti pakasaritaan ti biag ti autor (saan nga at-atiddog ngem maysa wenno dua a parapo), karaman dagiti contact information (adres, numero ti telepono/selpon, e-mail).

3. Ipatulod babaen ti e-mail dagiti sinurat iti gumil.filipinas@gmail.comwenno ipatulod babaen ti koreo iti Ariel S. Tabag #5 Cruz Apt., Arty 1 cor Piko Sts., Talipapa, Novaliches, Quezon City.

4. Masapul a maawat dagiti sinurat (nayemail man wenno babaen ti koreo) iti di naladladaw ngem Disiembre 31, 2009.

5. Agdalan dagiti sinurat iti naiget a panagarisit dagiti editor. Mapakaammuan dagiti autor a mairaman iti libro makabulan kalpasan ti naituding a deadline.

6. Maipablaak dagiti libro iti wagas a tagnawa, wenno panidna, bayadanna. Masuktanto ketdi iti libro a ti bilangna, depende iti kaibatogan ti naitagnawa a gatad.

7. Karbengan dagiti editor nga editen dagiti sinurat a naidatag.

8. Para iti dadduma pay a detalye, makiuman kadagiti editor iti gumil.filipinas@gmail.com wenno selpon 0918-745-8792.

Popularity: unranked [?]

Aglektiur da Juan S.P. Hidalgo, Jr., dati nga Associate Editor ti Bannawagken recipient ti CCP Gawad Dangal ng Lahi; ken Reynaldo A. Duque, dati nga Editor-in-Chief ti Liwayway ken Palanca Hall of Famer, iti panagsurat iti sarita inton Nob. 22, 2009, 1-5 P.M., iti 14 Juan Luna St. Area 2, UP Campus, Diliman, Quezon City.

Panangitultuloy daytoy iti serye ti lektiur a proyekto ti GUMIL Metro Manila, ti gunglo dagiti mannurat nga Ilokano iti Kamanilaan ken kabangibangna a probinsia, para kadagiti kamengna ken kadagiti interesado nga agkameng iti nasao a gunglo.

Kadagiti interesado a dumar-ay, ag-text-da iti 0918-7458792 wenno umawag iti 400-0089 agingga iti Nobiembre 20, 2009 para iti pannakaisagana dagiti masapsapul.

Mainaig itoy, agawaten ti Education Committee ti GMM kadagiti daniw, sarita ken sarilaysay (creative non-fiction) a manamnama a ma-workshop kadagiti sumaruno a serye ti lektiur. Ipatulod babaen ti e-mail ti soft copy dagiti sinurat iti arieltabag@yahoo.com, wenno ikoreo dagiti manuskrito iti GMM Education Committee, #5 Cruz Apt., Arty 1 cor. Piko Sts., Talipapa, Novaliches, Quezon City. (Ma. Rose A. Cabie)

Naipablaak iti Bannawag, Nobiembre 19, 2009.)

Popularity: unranked [?]