GUMIL Metro Manila

Inyalat ni Mighty C. Rasing ti Umuna a Gunggona ti Salip iti Sarita ti Premio Reynaldo A. Duque babaen ti saritana a “Tiket”.
Tubo iti San Manuel, Isabela ngem agnaed ita iti Quezon City, agpapaay ni Rasing a coordinator ti young people’s ministries ti Division on Ministries with Young People (DMYP) ti United Methodist Church.
Inyalat met ni Jovito F. Amorin, tubo iti Sta. Maria, Ilocos Sur ken empleado ti PLDT iti Makati ti Maika-2 a Gunggona babaen ti saritana nga “Itta”, idinto a ni Jake F. Ilac, tubo ti Lasam, Cagayan ken maysa a freelance agent ken entrepreneur iti pagaramidan iti silaw iti Valenzuela City ti Maika-3 Gunggona babaen ti saritana a “Subeg”.
Kas impakaammo ni Tessie Duque, esponsor ti pasalip, mayawat ti plake ken premio a kuarta iti Seremonia ti Pammadayaw a maangay iti Tagaytay Royale Estates, Alfonso, Cavite inton Nobiemre 8, 2009.
Itoy a tawen, naluktan ti pasalip kadagiti kameng ti GUMIL Metro Manila ken GUMIL Candon ken kadagiti interesado nga agkameng kadagitoy a gunglo.
Umawat dagiti nangabak iti sertipiko ti pammadayaw ken kuarta a premio, kas sumaganad: 1st Prize, $200; 2nd Prize, $150; Third Prize, $100.
Dagiti naghurado: Dionisio S. Bulong (pangulo), Juan S.P. Hidalgo Jr. (kameng) ken Cles B. Rambaud (kameng). (AST)

(Naipablaak iti Bannawag, Oktubre 26, 2009.)

Popularity: unranked [?]

Aglektiur ni Juan S.P. Hidalgo, Jr., dati nga Associate Editor ti Bannawag ken recipient ti CCP Gawad Dangal ng Lahi, iti panagsurat iti sarita a para ubbing inton Okt. 11, 2009, 1-4 P.M., iti 14 Juan Luna St. Area 2, UP Campus, Diliman, Quezon City.
Panangitultuloy daytoy iti serye ti lektiur a proyekto ti GUMIL Metro Manila, ti gunglo dagiti mannurat nga Ilokano iti Kamanilaan ken kabangibangna a probinsia, para kadagiti kamengna ken kadagiti interesado nga agkameng iti nasao a gunglo.
Kadagiti interesado a dumar-ay, mabalinda ti ag-text iti 0918-7458792 agingga iti Oktubre 9, 2009 para iti pannakaisagana dagiti masapsapul. (MRAC)

Naipablaak iti Bannawag, Oktubre 12, 2009, p.35.

Popularity: unranked [?]