GUMIL Metro Manila

Iti pannakitinnulong ti GUMIL Metro Manila ken GUMIL Filipinas

Salip iti Sarita 2010 ti SABALI Awards

Dagiti Pagannurotan:

1. Pasalip daytoy ti Savella-Baclig Literary Awards iti panangesponsor da Judge Vivencio S. Baclig (tubo iti Cabugao, I.S.), Presiding Judge ti Regional Trial Court Branch 77 iti Quezon City, ken ti kaingungotna, ni Nenita F. Baclig. Ti met GUMIL Metro Manila ti mangimaton iti salip iti pannakitinnulong ti GUMIL Filipinas.

2. Mangrugi ti salip iti Oktubre 1, 2009 ken aggibus iti Pebrero 28, 2010. Silulukat ti salip kadagiti amin a mannurat a kameng ti GUMIL Filipinas wenno ania man kadagiti chapter daytoy malaksid kadagiti kameng ti BANNAWAG.

3. Siwawayawaya ti mannurat a mangpili iti topiko ti suratenna a sarita. Agatiddog ti sarita iti 10-20 a panid, maimakinilia wenno computer-typed iti doble espasio iti 8-1/2” x 11” a bond paper iti ania man kadagitoy a font: 12 points Times New Roman wenno 12 points Book Antiqua.

4. Maysa laeng a sarita ti mabalin nga isalip ti kada mannurat. Ipatulod ti sarita iti uppat a kopia. Parbo a nagan ti usaren ti autor. Pakuyogan ti pakisalip iti narikpan a sobre a naglaon iti paulo ti sarita, pudno ken parbo a nagan ti autor, kompleto nga adres iti pagtaengan wenno iti pagtrabahuan agraman numero ti telepono ken/wenno selpon, maysa a nalawag a ladawan, ken ababa a pakasaritaan ti biag. Iti rabaw ti sobre, nasken nga ilanad ti paulo ti sarita a pakisalip ken parbo a nagan ti autor.

5. Nasken nga orihinal, di naipatarus manipud iti ania man a lengguahe, ken di pay nangabak iti ania man a pasalip, ti isalip a sarita.

6. Malaksid a maipablaakto iti BANNAWAG dagiti mangabak a sarita, adda met karbengan dagiti esponsor a mangilibro kadagiti mangabak a sarita nga awan ti ania man a sungsungbatanda iti autor.

7. Dagiti premio: Umuna a Gunggona, P10,000.00; Maika-2, P7,500.00; ken Maika-3, P5,000.00. Maikkatanto iti 10 porsiento dagiti premio ket maipanto iti pundo ti GUMIL Metro Manila.

8. Mapadayawanto dagiti mangabak bayat ti kombension nasional ti GUMIL Filipinas iti 2010.

9. Ipatulod ti pakisalip itoy nga adres: Salip iti Sarita 2010 ti SABALI Awards, c/o BANNAWAG, Manila Bulletin Publishing Corp., Manila Bulletin Building, Muralla cor. Recoletos Sts., Intramuros, 1002 Manila. Nasken a maawat ti BANNAWAG amin nga entry sakbay wenno iti kaaldawan ti Pebrero 28, 2010. Madiskualipika ti entry a maawat kalpasan dayta a petsa.

Popularity: 20% [?]

2nd Honor Blanco Cabie
Premio Iti Naisurat Iti Literatura
Ilokana (Cabie PINILI)

1. Esponsoran daytoy ni Maria Rosa A. Cabie, kaingungot ni Honor Blanco Cabie, premiado a sumasalaysay ken mannaniw, agiwarwarnak, orador ken debatista, ken propesor pay iti Literatura ken Kinaagiwarwarnak iti Metro Manila, ken dagiti annakda. Silulukat daytoy a Salip iti Sarita a Para Ubbing para kadagiti amin a mannurat iti Iluko ditoy Filipinas ken iti ballasiw-taaw.

2. Mairanta ti sarita a suraten para kadagiti ubbing nga agtawen iti innem agingga iti sangapulo. Agatiddog ti sarita iti 7-12 a panid, naimakinilia wenno naikompiuter, Times New Roman wenno Arial, iti doble espasio iti 8 1/2 x 11 a papel a coupon bond. Maysa laeng a sarita ti mabalin nga isalip ti tunggal mannurat.

3. Masapul a ti parbo a nagan ti maikabil iti manuskrito a pakisalip. No ipatulod babaen ti email: dua nga MS Word document files ti idatag. Umuna, ti sarita a pakisalip. Maikadua, ti parbo ken pudno a nagan ken pakasaritaan ti biag ti autor. No ipatulod babaen ti koreo: uppat a kopia ti idatag ken pakuyogan ti entry iti narikpan a sobre a nakailanadan ti paulo ti sarita, parbo ken pudno a nagan ken kabibiag ti autor. No iti email, iturong itiarieltabag@yahoo.com. No iti koreo, ipatulod iti Cabie PINILI Secretariat, c/o BANNAWAG, Manila Bulletin Publishing Corporation, Muralla corner Recoletos Sts., Intramuros, Manila.

4. Makaammo ti makisalip a mangpili ti tema ti saritana, ngem masapul nga adda pakainaiganna iti kultura ken dagiti napipintas nga ugali ni Ilokano.

5. Rumbeng nga orihinal, di pay naipablaak, di naadaw iti ania man a naipablaaken a sinurat, ken di pay nangabak iti ania man a salip iti panagsurat ti sarita nga isalip.

6. Agbalin a kukua ti esponsor dagiti nangabak a sarita. Maikkan pay iti karbengan a mangedit, mangatur ken mangipablaak iti libro, magasin wenno periodikal a pilina nga awan sungsungbatanna iti autor. Ngem agtalinaed ketdi ti copyright iti autor.

7. Saan a mabalbaliwan ti pangngeddeng dagiti hurado— malaksid no maduktalan kalpasanna a linabsing ti mannurat ti Alagaden Bilang 5. Iti dayta a panaglabsing, maibabawi ti gunggona ket saanton a mapalubosan pay ti autor a makisalip iti ania man a salip nga esponsoran ti Cabie PINILI.

8. Dagiti gunggona: Umuna, P5,000; Maikadua, P3,000; ken Maikatlo, P2,000. Maikkatto ti 10 a porsiento iti tunggal premio ket maipan daytoy iti pundo ti GUMIL Metro Manila.

9. Nasken a maawat ti pakisalip iti email wenno iti koreo iti saan a naladladaw ngem 11:59 p.m. iti Enero 31, 2010.

10. Saan a mapalubosan a makisalip dagiti kakabagian ni HBC ken dagiti esponsor iti ikub ti 4th civil degree of consanguinity ken affinity. Mapawilan pay dagiti kameng ti BANNAWAG a makisalip.

11. Mayawat dagiti premio bayat ti Kombension Nasional ti GUMIL Filipinas iti Kalgaw 2010.

12. Maibabawi ti premio dagiti nangabak no dida agatendar iti Awarding Ceremonies, malaksid no mangipatulodda iti pannakabagida ken agsuratda a pangilanadanda no apay a dida makadar-ay ket, iti panirigan dagiti esponsor, nainkalintegan dayta a rason.

Popularity: 23% [?]