GUMIL Metro Manila

 CAINTA, Rizal — Maangay ti umuna a Poetry Reading Contest iti tawen 2009 kadagiti kameng ti GUMIL Metro Manila, maysa kadagiti 18 a tsapter ti GUMIL Filipinas, iti daytoy nga ili intono Pegrero 14.
       Kinuna ni Engr. Ansel D. Cargo, presidente ti gunglo, a maigiddan daytoy a salisal para kadagiti bangolan ken agdadamo a mannaniw iti Valentine’s Party — pot luck — ti gunglo a maangay iti taeng da Honor ken Rose Blanco Cabie iti Brookside Hills Subdivision.
       Tallonto ti pilien dagitin hurado — maikkandanto amin iti premio.
       Ti makagun-od iti umuna a premio maibilang a dagus (automatic) a finalist iti angayen ti GMM a Poetry Reading Competition intono maika-43 nga anibersario ti gunglo intono Disiembre.
       Isubli ti GMM daytoy a pakontes — naiwayat idi 1992-1996 –kas pangparegta ken pangpaikkat nerbios kadagiti mannaniw a mangibasa iti daniwda wenno agbasa iti daniw ti sabali iti sangnguanan pagaaduan, innayon ni Cargo.
       Amin a makagun-od iti First Prize manipud Pebrero inggana’t Nobiembre, maisiguddan a Finalist intono Disiembre.
       Dagiti met saan a makaisagupit iti Umuna a Premio tunggal bulan, saanda a mapawilan nga agpailista kadagiti sumarsaruno a bulan.
       Mangitedto met ni Juan S.P. Hidalgo, Jr., maysa kadagiti mamagbaga iti GMM, iti mensahe kadagiti kameng maipanggep iti Valentine’s Day.
       Paset pay ti maidiaya a programa ti ballroom dancing kadagiti agduyos ti musika da Anastacio Mamaril, Damaso Perez Prado, Ray Anthony, Harry James, Benny Goodman ken Acker Bilt.
       Mairugi ti aktibidad ti gunglo iti alas tres iti malem. 
       Manamnama ti panagpautna daytoy a programa iti ingga’t malpas nasakbay a pangrabii iti alas siete, innayon ni Cargo. (Ma. Rose A. Cabie, GMM PRO)

Popularity: unranked [?]