GUMIL Metro Manila

Ni HONOR BLANCO CABIE
– Pinili, Ilocos Norte

dakayo kakailian a propesional ken balikbayan,
dakayo ti saksi iti daytoy rabii a naindaklan,
pannakakorona dagiti pagtamdam nga aribai,
dagiti addaan ken awanan ‘toy ipatpateg nga ili.

iti wasnay ti alfabeto, manipud a ingganat’ zeta,
insaluketyo nalnalpasyo ken agdama nga obra,
adudan pagtangtangsittayo nga accountant, arkitekto,
lider sibiko, doktor, abogado, zoologist nga adu.

ita, dua a rabii sakbay ti kabus, makitatayo
dagiti agkakalapsat, addaan sungdo musa a tallo,
isuda a makaited linglingay ken murmuray
ni i-pinili, naingamengan man wenno nakurapay.

nagasatkayo, kakabsatko a naggappu iti ballasiw taaw,
ta adda ubbog ragsakyo kadagiti rabii ken aldaw,
ngem nagasatkami met nga inkay dinanon,
ta matan-awanmi met dagitoy tallo a bubon.

kadagitoy tallo makapedped uwaw nga addaan lapsat,
pagsakduan ida’t umisu a pamigsa ken ragsak,
isuda dagiti pagrukbaban, mangituray kadatayo,
ubbing man, umar-arubayan, naasawaan ken serbado.

kaduaendak padak a mangipatpateg ‘toy napili nga ili,
dakayo pudno a pagpampanakkel natangkirang a puli,
ta innak itag-ay, ibandera dagiti nalungpo a balikas
para kadagiti tallo nga aribai, isuda nga addaan imnas.

mingminganyo dagiti tallo a nalibnos a kakailiantayo
adda karit kadakuada nga annadan ti tawidtayo,
koma kaabaydak a mangraraem kadakuada a kanayon
kadagiti ar-arapaapda, sirmatada nga itan mohon.

kadagiti limmabasen a panawen, agpapan iti agdama,
impasimudaagyo ti sin-aw arapaapyo a nagpaiduma,
ti kinaturay ti disiplina, ti awan kittangna nga anus,
ti kinasalun-at lagip a di nagsarday, di naggibus.

iti ili a nangtubayanyo ti arapaap nagsublikayo,
ket barukong kakailianyo nangtedkay’ ti sapsapo,
agsipud kadagitoy nabalitokan a talugading,
inikkanyo ti salun-at ken sirnaat adu a pingping.

kadagiti aramidyo italtal-oyo dagiti kakailian,
ik-ikkanyo pay ida iti kalasag iti masangnguanan,
sadinno man ti ayanyo, ania man a panawen,
adu dagiti riniingyo nakauldag a pontinpen.

kadagiti gapuananyo ipampamatmatyo ti kinatan-ok
parmata ken sirmatayo addaan sileng kas balitok,
inarakupyo dagiti kabbarbaro a kapanunotan
tapno makabinnuligyo, maitag-ayyo dagiti kakailian.

maanaraaran kadagitoy tulong ken aramidyo
determinasion, gagar, rugso ken reggetyo,
kakailian a nabati saanda met a nanglipat,
napalaus yamanda kadakayo kail-ilwmi a kakabsat.

kadagiti nadagaang pangatiddogen a kalgaw,
iti nasalemsem a nepnep puttotenyo ti uwaw,
ipakpakitayo ti panangtungtungpalyo kadagiti kari
tapno sumayaat panagbiag kakailianyo a nabati.

kanayon a tumpaw addaan piskelna a panunot,
mangiturong kadakayo papananyo a surbot,
pangkirausan bugas ken bagas pagsayaatan
ipatpategyo, mangipatpateg met, a kakailian.

saludoankayo, appo ipatpategmi a balikbayan,
dakayo a sarsaraboen ti intero a pagilian,
dakayo a banuar, tinawen nga agsubli-subli
iti dungdungngoen, salsalakniban nga ili.

tinawen nga agaw-awidkayo tapno umaykayo
makiinniliw, makipagragragsak iti piestatayo
no kastoy a malpas panagapit kadagiti produkto,
kas kadagiti lasona, bawang ken tabako.

daytoy ti ili nga impasdek dagidi am-ammatayo,
kaduada daydi apo gregorio aglipay, lider dagidi gerilyero,
babaen orden ehekutibo daydi francis burton harrison ,
tapno barangay nga agngayangay maaddaan parbangon.

daytoy ti ili a nagnagnaan dagidi mannakigubat,
hapon, amerikano ken filipino darada ti naisuyat
kadagidi masansan maat-atianan bangkag ken kinelleng,
tured nga impakitada nasudi pulos saan a nagtukeng.

manipud panangipatugaw ‘di aglipay kadaydi felipe arcangel,
ti ilitayo a pinili nagbalin a munisipio a pagpanakkel,
nabaknang kadagiti naindaklan a gameng ken salaysay,
ubbog nabaknang a kultura, mabalin a pagmurmuray.

riknaenyo panagpitik puso dagiti kaarakupyo,
mariknayo la ketdi ayat nga addaan sagrado,
dagita dagiti kakailianyo a dinto met manglipat
kadagiti nabalitokan nga aramidyo ken impamatmat.

ita, kakabsatko, kibinendak ta innakon idaton,
balikas pagliplipiasan naraay a parbangon,
dagita para kadagiti patubotayo nga aribai,
isuda nga ipatpateg pakairamanan a puli.

ammok nga iti kaunggan pusoyo a kakailian,
agassoso pay lat’ sang-awna wenno nataengan,
dagitoy ibuksilak a balikas inda agpitpitik,
balikas a no malukaisan mangted pudno a pikapik.

o babbalasang napnuan imnas ken kinaemma,
naipangpangruna nga aribai nadayag nga isla,
itdenyo kadagiti kakailianyo silaw nga addaan pateg,
mangiwanwan sangnguanan tapno dida maimameg.

iti unos dua a tawen a dakay’ pagtamdan a reyna,
adunto dagiti kakailian ken saan a maallukoyyo iti dana,
dakayo ti ubbog namnama ken pagsanggiran
kakailianyo ballasiw taaw ken ili a nakaiyanakan.

amin dagiti garawyo, kasta metten inlagayo a balikas,
isudanto latta kadagiti kakailianyo ‘tay umag-agibas,
isudantot’ pagpidutanda nabisked a pagulidanan,
mangted tibker iti agdama ken masangnguanan.

dakayo ti ubbog pigsa, ragsak ken talinaay,
makagutigot, makapabang-ar a linglingay,
dakayo naidumdumat’ linisna a sarming,
pagkurkurnoan addaan taeng ken ub-ubbing.

kadagiti nadagaang, makassinit a kalgaw
isemyo makapasalibukag a sapsapo kadagiti maul-ulaw,
kadagiti nasalemsem, mangselsellep a nepnep
managsaraaw a rusok dakayo daytay dengngep.

iti ballasiw taaw wenno ditoy ili a naggapuan
galad ken talugadingyo isudat’ pagsukogan,
iduldulin pagpampanakkel, sadag ni i-pinili,
addaan buteng iti Ama, Ari a manangngaasi.

ammo ni i-pinili a dagita korona diyonto dungisan,
panangtagibiyo indanto pagdidinnamagan,
ta dakayo, aribai nga i-pinili naemma a balikbayan,
pagulidanan, sarming, ipatpategyo a kakailian.

nanumo man nalaga a daniw nga ibukbuksilak,
nakasaluket ditoy umno unay nailian a ragsak,
ragsak a naggubuay iti sin-awyo ken kinasantak,
o aribai, sabongkayo a naayamuom ken napusaksak.

ipalubosyo ngaruden, pagtamdak ida, nga innak isaad,
dita ulo ni reyna ti kapia korona a napnuan rimat,
pagraeman umili, aribai ap-apalan ni gasat,
mangted kadagiti kakailian ragsak di agressat.

*indaniw ni honor blanco cabie, presidente ti GUMIL filipinas (1995-1999)
sakbay a kinoronaanna ti reyna ti kapia – queen of peace carol (pagdilao) the 1st – iti balikbayan night ti pinili town fiesta idi april 18, 2008, dua a rabii sakbay ti kabus, iti pinili amphitheater iti barukong ti plasa ti ili, 457 a kilometro manipud iti luneta, manila. kadua ni reyna carol dagiti dua pay a reyna: queen of joy nelda dahilig ken queen of love julie ann cabie.

Popularity: unranked [?]