GUMIL Metro Manila

Ipalagip ti Awards Committee ti GUMIL Filipinas, ti gunglo dagiti mannurat nga Ilokano iti Filipinas ken iti ballasiw-taaw, nga agingga iti Peb. 28, 2009 ti pannakaawat ti nominasion para iti Pedro Bucaneg, Leona Florentino, Bannatiran ken Pamulinawen Awards.

Maited ti pammadayaw iti rabii ti umuna nga aldaw ti Maika-41 a Kombension Nasional ti gunglo a maangay inton Abril 11-12, 2009 iti Our Lady of the Angels Seminary, Brgy. Bagbag, Novaliches, Quezon City. Mabalin nga aginominar ti ania man a chapter ti GUMIL Filipinas, wenno dagiti datin a napadayawan kadagiti nasao nga award.

Personal a yawat ti nominasion iti asino man nga opisial ken kameng ti BOD ti GF wenno ipatulod babaen ti e-mail iti gf_awards@yahoo.com wenno babaen ti koreo iti 98 K-10^th St., Barangay East, Kamias, Quezon City.

Mainaig itoy, maipakaammo kadagiti regular a kameng ti GF ken kadagiti mannurat nga agngayangay nga agkameng a makikoordinarda iti chapter president para iti panagpareserba ken dadduma pay nga annongen mainaig iti GF ken iti kombension.

Maipakaammo met nga agawat ti Registration & Seminar-Workshop Committee agingga iti Marso 11, 2009 iti sarita a maidasarto iti workshop. Ipatulod ti sarita iti: gf_registration@yahoo.com.

Maipalagip met a napagnunumuan dagiti opisial ken kameng ti BOD ti GF a P600 ti registration fee ti regular a delegado; P500 iti senior citizen idinto a P400 iti estudiante.

Maipalagip pay a maangay ti maudi a regular a miting dagiti agdama nga opisial ken kameng ti BOD ti GF inton Marso 8, 2009 (saan a Marso 1 kas immuna a naipakaammo) iti Brgy. Torre, Currimao, Ilocos Norte iti panagsangaili ni Ma. Kristine Peralta, Mutia ti GF, kas impakaammo ni Baldovino Ab. Valdez, presidente ti gunglo.

Maigunamgunam ti yaatendar dagiti amin a chapter presidents wenno pannakabagida ken dagiti dati a presidente ti GF a napusgan a mangimaton iti eleksion ti GF. (L.S. Fagaragan)

Bannawag, Pebrero 16, 2009

Popularity: unranked [?]