GUMIL Metro Manila

Rambakan ti National Commission for Culture and the Arts (NCCA) ti “Bulan ti Arte” itoy a Pebrero, 2009 babaen ti Philippine International Arts Festival (PIAF) a maaramid iti nadumaduma a paset ti pagilian ken pakipartisiparan dagiti lokal ken nasional nga annak ti arte.

Mairaman dagiti sumaganad kadagiti nadumaduma a programa nga isagsagana ti NCCA para iti daytoy makabulan a parambak: 

Pormal a Panaglukat. Pormal a maluktan ti parambak iti tallo a programa: iti “Sining Gising” a programa ti NCCA iti NBN 4; iti “Concert at the Park” a maipabuya met laeng iti NBN 4 (delayed telecast); ken iti maysa a variety program iti telebision a para Domingo. Aggigiddan pay a maangay ti panaglukat ti festival kadagiti napili a lugar iti Luzon, Visayas ken Mindanao. 

PA(ng)LABAS. Maysa a travel exposition, lecture forum ken film showing a maangay iti Cine Adarna, Aldaba Theater iti UP (Pebrero 9-13, 2009); Cultural Center of the Philippines (Pebrero 16-20, 2009); ken University of San Carlos, Cebu (Pebrero 13-27, 2009). 

Walai – Bernakular nga Arkitektura iti Mindanao. Maysa nga eksibit a pakaipakitaan dagiti bernakular a pagtaengan iti Mindanao. Malaksid iti eksibit, adda pay maangay a lektiur ken pabuya kadagiti ritual a sala ken dadduma pay nga adda pakainaiganna iti arkitektura. Maangay daytoy inton Pebrero 1-6, 2009. 

Sinerehiyon. Pannakaipabuya dagiti pelikula a manipud kadagiti nadumaduma a paset ti pagilian. Maangay iti Cultural Center of the Philippines inton Pebrero 17-19, 2009. 

Tanghal! Ti Maikatlo a National University Theater Festival. Panagpabuya dagiti dance troupe dagiti nadumaduma a kolehio ken unibersidad iti Filipinas babaen ti tulong ti Lusong Luzon Arts and Culture Network. Maangay iti Colehio de San Juan de Letran-Calamba inton Pebrero 10-14, 2009. 

Taboan Philippine Writers Festival. Panagkikinnomusta ken panagtitipon dagiti mannurat iti pagilian a maangay iti UP Diliman, Ateneo de Manila, ken Cubao Expo inton Pebrero 11-13, 2009. 

Organik Muzik. Konsierto a pakakitaan dagiti panagbalbaliw ti samiweng dagiti Filipino. Maangay iti SM Baguio inton Pebrero 7, 2009; SM Cebu inton Pebrero 14, 2009; SM Davao inton Pebrero 21, 2009 ken SM Mall of Asia, Pebrero 28, 2009. 

Kas paset ti panangrambak iti Bulan ti Arte, mapirmaan met ti Memorandum of Agreement iti nagbaetan ti NCCA ken ti gobierno probinsial ti Rizal para iti pannakaipatakder ti Artists’ Housing Village iti Angono, Rizal. Maluktan met ti Metropolitan Theater ken mayalnag ti Urdaneta Park iti Urdaneta City, Pangasinan kas pangrambak iti maika-500 a tawen ni Fray Andres de Urdaneta. (Sherma E. Benosa)

(Bannawag, Enero12, 2009)

Popularity: unranked [?]