GUMIL Metro Manila

Angayen ti Ilokano Language and Literature Program iti Unibersidad ti Hawaii iti Manoa ti Maika-4 a Nakem International Conference a “Dap-ayan: Sharing and Understanding Ethnolinguistic Worlds Towards Cultural Pluralism” inton Nobiembre 11-14, 2009 iti UH Manoa.

Manamnama a dumar-ay itoy uppat-nga-aldaw a komperensia dagiti cultural researchers, dagiti edukador iti tawid a lengguahe, dagiti mangitantandudo iti pannakapadur-as ti kannawidan ken kultura, dagiti lider iti pannakabalabala dagiti pagalagadan a para iti sapasap, dagiti mangmangged iti kultura, ken dagiti mannurat ken artista nga interesado kadagiti isyu ti lengguahe ken kultura.

Para kadagiti agidatag iti sinuratda, makiddaw kadagitoy ti panagidatagda nga umuna iti abstract wenno ababa a panangilawlawag no ania dayta a pangpanggependa a suraten a maisentro iti ania man kadagitoy a patangan: Ilokano and heritage language teaching and the world languages curriculum; appreciating ethnolinguistic worlds; tangible heritage from the various ethnolinguistic groups; theories and practices in the sharing and understanding of a heritage; cultural pluralism as a philosophy of education; pathologies of multiculturalism, remedies of cultural pluralism; languages and cultures in the diaspora; subversions of the multicultural Philippines experience; ken, mass media, popular culture, and heritage education.

Ni Dr. Aurelio Solver Agcaoili, coordinator ti Ilokano Language and Literature Program iti UHM, ti mangipangulo iti komperensia. Kakaduana da Dr. Lilia Quindoza Santiago, assistant professor iti Ilokano, UHM; ken Dr. Raymund Liongson, coordinator ti Philippine Studies Program iti Leeward Community College.

Dagiti dadduma pay a kameng ti steering committee: Clem Montero, lecturer iti Ilokano ken education specialist iti UH Center for Philippines Studies ken Julius Soria, instructor iti Ilokano iti UHM ken instructor met laeng iti Ilokano iti Farrington High School iti Kalihi, iti met laeng Honolulu.

Masapul a maipatulod ti abstract iti di naladladaw ngem Enero 31, 2009 iti nakemconference@yahoo.com, cc iti lilias@hawaii.edu ken rliongson@gmail.com. Mapakaammuan dagiti napili sakbay wenno iti kaaldawan ti Pebrero 15, 2009.

Maammuan dagiti dadduma pay a pakaammo maipapan iti komperensia iti nakemconferences.blogspot.com. Mabalin pay ti bumisita iti website ti programa iti Ilokano Language and Literature iti UH Manoa (biroken sadiay ti Nakem Conference).

Popularity: unranked [?]