GUMIL Metro Manila

CANDON CITY – Balligi ti kaunaan a Begnas Ylocos 2008 a naangay itoy a siudad manipud idi Oktubre 28-30 a nakaitanduduan dagiti kultura dagiti minoridad iti Ilocos Sur kas kadagiti Bago, Tingguian, Itneg, Kankanaey ken dadduma pay babaen ti tema nga “Agbiag ti Kaugalian a Nainsigudan”.

Segun ken ni Leon Lais, dati a mayor ken maysa kadagiti bigbigbigen a tribal elder iti San Emilio a maysa ti Begnas a wagas ti panagyaman dagiti indigenous people (IP) wenno katutubo ken ni Kabunian kalpasan ti panagaapit babaen ti panangiruknoy kadagiti daton (kas iti maparti a baboy) ken salsala.
“Manipud pay idi un-unana a panawen, ar-aramidenen dagidi appomi ti begnas,” inlawlawag ni Lais.

Kinuna met ni Gob. Deogracias Victor “DV” Savellano a babaen itoy a selebrasion, mapagkaykaysa dagiti amin a tribu tapno mataginayon ti kulturada ken malapdan ti pannakapukaw dagitoy.

“Napintas ti apit ita a tawen ket rumbeng nga agyamantayo ken ni Apo Kabunian. Matagutago tayo am-in (Agbiagtayo amin),” indir-i ti gobernador bayat ti pannakailukat ti Begnas ritual a nakipartisiparan ti 23 a munisipalidad nga addaan iti tribal barangays.

Inkari met ni 2nd District Representative Eric Singson a sisusuporta ti opisinana iti kastoy a parambak. Napagpatanganda payen ken Gob. DV a tinawen nga isayangkatda ti Begnas Ylocos.

Iti Search for Miss Baggak ti Daya 2008 idi Oktubre 29, inyawid ni Cherry Rose Pineda ti Salcedo ti korona ken premio a P20,000. Napili met a First Runner Up ni Diannne Tongol ti Sta. Cruz a nakaawat iti P20,000 kas premio, ken second Runner Up ni Rukaiya Dagian ti Gregorio del Pilar a nangyawid iti P10,000.

Iti minor awards, napili a Best in Talent, Star of the Night, Best in Swimsuit ken Best in Long Gown ni Dianne Tongol, Best in Costume ni Maribel Sabuquel ti San Emilio, Miss Photogenic ni Clariss Domenden ti Sta. Cruz, Ilocano’s Choice ni Cherry Rose Pineda, ken Miss Friendship ni Rukaiya Dagian.

Nagkampeon met iti Traditional Ensemble ti San Emilio, idinto a nagpuesto ti Quirino, Gregorio del Pilar, Galimuyod ken Lidlidda iti maikadua agingga iti maikalima.

Inyalat met ti Sarmingan, Narvacan, I.S. ti umuna a puesto iti Chorale Competition a naangay iti maudi nga aldaw ti Begnas. Binagi met ti Pidpid, Sta. Cruz; Cadanglaan, Magsingal; Bugnay, Candon City ken Nagsingcaoan, Cabugao ti maikadua agingga iti maikalima a puesto, kas panagsasaganadda. (Mancielito S. Tacadena/NBN Vigan)

Popularity: unranked [?]