GUMIL Metro Manila

  Maysa nga orador, dua a propesor iti unibersidad, maysa nga agilinlinteg, dua a periodista, ken maysa a komunikador ti aglalaban iti kampeonato iti Saribitniw a maangay inton Nobiembre 30, 2008 iti La Union National High School auditorium iti San Fernando City.

            Daytoy ti impakaammo ti Sir Pelagio Alcantara Development (SPADE) Foundation.

            Kuna ti SPADE a napili dagiti finalists iti ragup ti 17 a nakisalip. Maammuanto dagiti mangabak kalpasan ti panaglalabanda iti oral delivery iti naikeddeng nga aldaw a panglukat iti maika-2 nga Ilokano Literary-Cultural Festival.

       Dagiti aglalaban: Professor Honor Blanco Cabie iti Metro Manila; Prof. Clarito de Francia  iti University of the Cordilleras iti Baguio City; Prof. Jaime Raras iti University of Northern Philippines Candon Campus; Atty. Sinamar Sanchez  ti Pangasinan; Errol Abrew, editor ti Regional Diaryo iti La Union; Guillermo Concepcion, publisher ti Vigan Chronicle a nakabase iti Laoag City, Ilocos Norte;  ken Henry Lagasca  ti PIA Rehion I iti San Fernando City.

            Dagiti premio: P10,000 ken sertipiko, umuna a gunggona; P7,000 ken sertipiko, maikadua a gunggona ; P5,000 ken sertipiko, maikatlo. Addanto pay pangkonsolasion a gunggona para kadagiti tallo a sumaganad a minor winners. 

            Kadua ti SPADE ti National Commission for Culture and the Arts (NCCA) a nangisayangkat itoy a salip.

            Ni La Union Gob. Manuel C. Ortega ti kangrunaan a sangaili ken agbitla. Mangtedto met iti mensahe da  Chancellor Priscilla S. Macansantos, Vice Head ti National Committee on Literary Arts ti NCCA; Director Washington M. Agustin ti TESDA Rehion I; ken Dr. Consolacion L. Aquino, prinsipal ti La Union National High School ken presidente ti  GUMIL San Fernando City.

            Itoy nga okasion, agsapatanto dagiti baro nga opisial ti GUMIL San Fernando City. Ken maitedto met ti sertipiko dagiti nangabak a taga-La Union iti salip iti Innaduan iti Urnong a Bannawag – da Odilon Arizala ti Bauang ken Fernando Negrillo ti Luna.

            Iti maikadua nga aldaw, Desiembre 1, maisarunonto ti Ilokano Literary Book Exhibit agraman ti on-the-spot poetry writing and reading contest para kadagiti estudiante ti kolehio ken ti literary quiz bee para kadagiti agad-adal iti haiskul.  

            Mairaman iti eksibit, dagiti antolohia iti sarita, daniw, nobela ken drama dagiti mannurat nga Ilokano ken dagiti napili a gapuananda a naipablaak iti Bannawag manipud  kadagiti naidulin a nagkauna nga issue agingga iti agdama. Kangrunaan kadagitoy dagiti immuna a premiado a sarita iti orihinal a langada, kas naipablaak iti Bannawag idi dekada 60.

            Daytoyto ti panggibus iti pannakarambak ti Maika-2 nga Ilokano Literary-Cultural Festival a manamnama a dar-ayanto met dagiti mannurat nga aggapu iti nadumaduma a deppaar ti Filipinas ken dagiti espesial a sangaili  nga idauluan da Tito ken Dureza Aquino a mangibagi iti Model OFW Family iti Rehion I idi 2005.  (manipud iti http://saluyot.wordpress.com)

Popularity: unranked [?]