GUMIL Metro Manila

Pimmusay ni Glicerio “Cering” Gallardo, mannurat iti BANNAWAG, iti edadna a 74 idi Oktubre 20 gapu iti nabayagen a panagsaksakitna.

Dati a presidente ti GUMIL Isabela, naipasngay ni Tata Cering (awagna kadagiti kasingedna a mannurat) idi Pebrero 7, 1934 iti Jones, Isabela kada sigud a Mayor Lucas Gallardo ken Efipania Calamba, agpada a pimmusayen.

Nagkolehio iti University of the East ken Jose Rizal College, addaan pay iti units iti Journalism ni Tata Cering.

Malaksid iti BANNAWAG, nagsursurat pay ni Tata Cering iti Weekly Amianan (kas kolumnista), Northern Sierra Madre Express ken City Star.

Retirado met a kameng ti ISAFP Civilian Intelligence Group.

Inulilana ni Emma Calixto-Gallardo, social worker iti DSWD-Jones, a kasimpungalanna ken dagiti pito nga annakda. (Villamor Visaya, Jr.)

(Bannawag, Nobiembre 3, 2008)

Popularity: unranked [?]

Maangay ti maikatlo a regular a board meeting ti GUMIL Filipinas, ti gunglo dagiti mannurat nga Ilokano iti Filipinas ken iti ballasiw-taaw, inton Nobiembre 9, 2008, 10 A.M., iti “Balay ti GUMIL”, Suso Beach, Sta. Maria, Ilocos Sur, kas impakaammo ni Baldovino Ab. Valdez, presidente ti gunglo.

Mapagpapatangan iti nasao a miting ti pannakaangay ti maika-41 a Kombension Nasional ti GF inton Kalgaw 2009 ken ti proyekto a libro maipanggep iti 40 a tawen ti GUMIL Filipinas.

Maigunamgunam ti idadar-ay dagiti opisial ken kameng ti BOD ti GF ken amin a chapter president’s wenno pannakabagida.

Para iti dadduma pay a detalye, agteks/umawag ken ni Rogie C. Baysa, sekretario-heneral ti GF, iti CP 0921-3746452. (AST)

(Bannawag, Nobiembre 3, 2008)

Popularity: unranked [?]

Indauluan ni Jovito F. Amorin ti Ilocos Sur dagiti nangabak iti Umuna a Premio Reynaldo A. Duque a anaggibus idi Set. 30 babaen ti saritana a “Kabbalay”, kas impakaammo ti Secretariat ti nasao a salip.

Kadua ni Amorin a nangabak da Sherma E. Benosa ti Nueva Vizcaya, Maika-2 a Gunggona (“Dagiti Babassit Nga Alipugpog”); ken Aida C. Tiama ti Pangasinan, Maika-3 a Gunggona (“Ni Angkel Bartolome”).

Mapadayawanto dagiti mangabak inton Okt. 26 iti seremonia ti pammadayaw iti pagtaengan da agkaingungot a Reynaldo ken Tessie Duque iti Tagaytay Royal Estates, Alfonso, Cavite.

Dagiti hurado: Juan S.P. Hidalgo, Jr., Jose A. Bragado, ken Honor Blanco Cabie.

Naipanagan ti salip ken ni mannurat iti BANNAWAG Reynaldo A. Duque ti Bagani Ubbog, naluktan daytoy umuna nga edision ti salip kadagiti kameng ti GUMIL Metro Manila kas pangparegta kadakuada nga agputar kadagiti maipagpannakkel a sarita. (Ma. Rose A. Cabie)

(Bannawag, Oktubre 27, 2008)

Popularity: unranked [?]

Naluktan itay nabiit ti Buridek Children’s Museum iti Mira Hills Fil-Spanish Friendship Park kagiddan ti pannakarambak ti UNESCO Heritage Cities Solidarity Day.

Ti Buridek ti umuna a museo a para kadagiti ubbing a naipasdek iti Amianan a Luzon ken maikatlo iti sibubukel a pagilian.

Segun ken ni UST Prof. Eric Zerrudo, maysa kadagiti nangdisenio iti Buridek ken adopted son ti Vigan a ti museo ti take-off project kalpasan ti cultural mapping seminar a naangay itoy a siudad.

Aw-awisen ni Zerrudo dagiti ubbing iti Amianan a pumasiar iti nasao a museo a pakatakuatan iti kinaasino ni Ilokano.

Kas inlawlawag daytoy, addaan iti tallo a pasdek ti museo: umuna ti kiaw (yellow) a pakatakuatan ken pakairuaran ti kinamanagsaludsod ti ubing; maikadua ti balbag (asul/blue) a pakaam-ammuan iti kinaasino (identity); ken ti rosas (pink) a pakairuaran ti kinaresponsible ken panangtaginayon (continuity) kadagiti naimbag nga aw-awid. (Mancielito S. Tacadena/NBN Vigan)

(Bannawag, Oktubre 27, 2008)

Popularity: unranked [?]