GUMIL Metro Manila

GUMIL Metro Manila
Gunglo dagiti Mannurat nga Ilokano iti Metro Manila, Inc.
GUMIL Filipinas Chapter, c/o Bannawag, Manila Bulletin Publishing Corporation
Muralla cor. Recoletos Sts., Intramuros, 1002 Manila
Tel: 4000-089; e-mail: gumilmetromanila@yahoo.com; blog: http://gumilmetro.wordpres.com

Hunio 26, 2008

Patgenmi a Kagumilan,

Kablaaw, apo!

Sidadayawkami a mangipakaammo a maangay ti general membership meeting ti GUMIL Metro Manila iti Lot 26, Block 4, Dandelion St., Bloomfields Subdivision, Novaliches, Quezon City inton Hulio 13, 2008 iti alas nuebe iti bigat babaen ti panangsangaili da agkaingungot a Judge Vivencio ken Nenita Baclig.

Mayalnag ti umuna a bilang ti Saluyot para itoy a tawen, ken maiparang dagiti napagpapatangan iti kaudian a board meeting dagiti opisial ti GMM.

Para iti dadduma pay a detalye, umawagkayo laeng iti telepono bilang 400-0089 wenno agteks iti CP bilang 0918-7458792.

Para iti balligi ti gunglo, namnamaenmi ti kaaddayo.

Iti nagan ti presidente,

Ariel S. Tabag
Sekretario, GMM

Ipapan iti pagtaengan da Apo Baclig:

•Iti Philcoa, aglugan iti dyip a nagkaratula iti Bagong Silang-Maligaya (uray ania iti Kanan wenno Kaliwa); bumaba iti Maligaya Gate ti Bloomfields Subdivision. Amaden iti guardia ti adres.
•No adda iti EDSA, aglugan iti bus a mapan iti Tungko. Bumaba iti SM Fairview. Aglugan iti dyip a nagkaratula iti Bagong Silang-Maligaya (uray ania iti Kanan wenno Kaliwa); bumaba iti Maligaya Gate ti Bloomfields Subdivision. Amaden iti guardia ti adres.
•No bilang mapukaw, umawag kada Apo Judge Baclig, telepono bilang 417-0847 ken 461-7005. Wenno agteks itoy numo: 0918-745-8792
•Mabalin met ti sumrek iti Zabarte Gate ti nasao a subdibision.

Popularity: unranked [?]

Iti maikapat a gundaway, marambakan itoy a Hunio 30 ti Philippine-Spanish Friendship Day, kas sagudayen ti Akta Republika 9187 a nagpaayan ni Sen. Edgardo Angara kas kangrunaan nga autor.

Sagudayen ti linteg, tinawen a marambakan iti tunggal Hunio 30 iti Filipinas ti Philippine-Spanish Friendship Day kas pammigbig iti panaggayyem ken kadagiti kannawidan a nagbibinglayan ti Filipinas ken Espania.

Immuna a narambakan idi 2003, panangilagip pay daytoy iti maudi a panagsalaknib ti agarup 50 a soldado a Kastila kontra kadagiti Filipino babaen ti panamagbalinda iti simbaan ti Baler, Tayabas (probinsia ti Aurora itan ) kas maudi a kutada. Ditoy nga impakitada ti kinaturedda a nangdayawan kadakuada dagiti buyot a Filipino. Itoy a tawen, tampokan ngarud ti selebrasion ti reenactment a maangay idiay Baler.

Malaksid itoy, adu pay dagiti aktibidad para iti Philippine-Spanish Friendship Day para iti sibubukel a tawen kas iti sumaganad:

• Pilgrimage iti sentro ti Baler inton Hunio 29-30, 2008. Mairaman ditoy ti pannakaipabuya ti maysa a komedia ken ti pannakatulad ti “Pagkubkob ng Baler” iti Hunio 30;
• Philippine-Spanish Football Cup inton Hunio 29, 2008 iti Ateneo de Manila University football field;
• Symposium maipanggep iti “Studies of Philippine-Spanish Relations: Evaluation and Prospects” inton Hunio 20, manipud iti alas siete iti bigat agingga iti alas 9 ti rabii iti National Museum. Kalpasan ti nasao a symposium, mangiparang ti Manila City Choir, UP Concert Chorus ken dagiti soprano a da Aizel Izza E. Prieto ken Feona B. Turalbe kadagiti kankanta a Filipino ken Kastila;
• Komperensia akademiko, ti España-Filipino Tribuna a maangay inton Nobiembre iti Cebu ken Manila; ken
• Commemorative stamp maipanggep ken ni Fray Andres de Urdaneta, a marambakan met itoy a tawen ti maikalima gasut a panagksangayna, a mayalnag inton Hunio 25, 2008 iti NCCA.

Nadumaduma nga ahensia ti nagkaykaysa para itoy a selebrasion kas iti National Historical Institute, National Commission for Culture and the Arts, Opisina ni Senador Edgardo Angara, Department of Foreign Affairs, Department of Tourism, Commission on Higher Education, Embahada ti Espania, Instituto Cervantes, Philippine Sports Commission, Philippine Football Federation, ken dadduma pay. (Noli S. Dumlao)

Popularity: unranked [?]

Maangay ti maikalima a regular a board meeting ti GUMIL Filipinas, ti gunglo dagiti mannurat nga Ilokano iti Filipinas ken iti ballasiw-taaw inton Mayo 22, 9 A.M., iti Mezzanine, Agriculture Building Function Room, Capitol, Bayombong, Nueva Vizcaya iti panangsangaili ni GF director Ruperto P. Manuel, kas impakaammo ni Baldovino Ab. Valdez, presidente ti gunglo.

Mataming iti miting dagiti nadumaduma a proyekto ti GF kas iti Balay ti GUMIL ken panagilibro. Maigunamgunam ti yaatendar amin nga opisial ken direktor ti gunglo ken uray pay dagiti chapter presidents.

Kadagiti chapter president a dumar-ay, masapul nga ipatalgedda ti yaatendarda ken ni GF Dir. Manuel iti CP 0917-2720852. Para iti dadduma pay nga impormasion iti miting, kontaken ni GF Secretary-General Rogie C. Baysa, CP 0921-3746452. (Leo S. Fagaragan) -Bannawag

Popularity: unranked [?]

Mapagsasaritaan dagiti proyekto ti GUMIL Metro Manila iti board meeting dagiti opisial ken kameng ti hunta direktiba ti gunglo inton Hunio 15, 9 A.M. iti pagtaengan da Honor ken Ma. Rose Blanco Cabie iti Brookside Subd., Cainta, Rizal , kas impakaammo ni Engr. Ansel D. Cargo, presidente ti gunglo.

Malaksid kadagiti proyekto, mapagnanaminganto pay dagiti dadduma a banag a pakaseknan ti gunglo a mapagsasaritaanto iti general membership meeting inton Hulio 13 iti pagtaengan ni Judge Vivencio S. Baclig, legal consultant ti gunglo, iti Bloomfields Subdivision, Novaliches, Quezon City.

Daytoy ti umuna a miting dagiti opisial ken kameng ti hunta direktiba kalpasan ti eleksion idi Mayo 11 iti rest house da Rey ken Tess Duque iti Alfonso, Cavite. (Ma. Rose A. Cabie)

Popularity: unranked [?]