GUMIL Metro Manila

Pimmusay ni premiado a mannurat iti BANNAWAG Bernardo “Ben” D. Tabbada iti tawenna a 71 (naipasngay idi Enero 16, 1936) gapu iti atake iti puso idi Setiembre 21.

Naipasngay iti Bangued, Abra ngem dimmakkel iti Brgy. Flora, Sto. Domingo, Ilocos Sur nga ili ni tatangna (i-Vigan ni nanangna), inyalat ni BDT ti Umuna a Gunggona ken Maika-2 a Gunggona iti Salip iti Sarita iti Iluko ti Palanca Awards 2006 ken 2007, kas panagsaganadda.

Mabigbig pay a mannaniw, adu ti rimmuar a daniwna iti Ingles iti Kislap-Graphic, This Week Magazine, ken iti dati a Manila Chronicle. Kaaduanna ketdi kadagiti daniwna ti sinuratna iti Iluko ket rimmuar iti BANNAWAG a nagsursuratanna met iti sarita (Basaen ti maysa kadagiti saritana nga immuna nga impablaak ti BANNAWAG idi 1969 iti panid 6 itoy a bilang.)

Nangala ni BDT iti Pre-Med iti Unibersidad ti Filipinas, nagtrabaho iti Caltex Philippines, sa kalpasanna, sinerrekna ti negosio a meat processing a negosio ti pamiliada agingga ita.

Inulila ni BDT ti kaingungotna, ni Flor, maysa a sarsuelista a kaarrubana iti Brgy. Flora; dagiti annak, mamanugang ken appokoda, da:

• Godofredo, civil engineer, UST (nayasawa ken ni Shiela; annakda da Lean, Miguel, Niko, Pauleen, ken Renzo);
• Hermogenes, arkitekto, UST (nayasawa ken ni Lisa);
• Isagani, arkitekto, FEU (nayasawa ken ni Mariflor; anakda ni Onella Marie);
• Joaquin, civil engineer, UST (nayasawa ken ni Rosalyn; annakda da Quiara ken Joshua, agindegdan iti Reno, Nevada);
• ken Karina, nagturpos iti Environmental Ecology iti University of the Philippines-Los Baños, balasang pay, ken tumultulong a mangimatmaton iti negosioda.

Agindeg ita ti pamilia Tabbada iti No. 1 S. Alvarez St., Project 4, Quezon City.
____

nakamassayag ti bangkayna iti Funeraria Paz iti Araneta Avenue, Quezon City.